Somos Noemí (psicóloga e mediadora) e Olaia (politóloga especializada en migracións e cidadanía). Fillas de mestra e parte dunha familia mixta afrodescendente.

Somos moitas familias as que vivimos unha diversidade étnico-racial que despois non atopamos nos centros educativos. A ausencia de referentes, máis aló dos núcleos próximos e familiares, é unha realidade coa que temos que lidar día a día, o cal deixa unha pegada considerable no proceso de construción da identidade tanto na infancia como na adolescencia. Todo iso nun espazo que deixa de ser seguro se non se ten en conta a representatividade da sociedade actual. A convivir apréndese e apréndese practicando. Desde Trocadela achegamos ferramentas e recursos para asentar as bases desa aprendizaxe, desde idades temperás, facendo equipo coa comunidade educativa.