Somos Noemí (psicóloga e mediadora) e Olaia (politóloga especializada en migracións). Irmás e distintas como a noite e o día, así que levamos moitos anos xestionando diferenzas para entendernos, respectarnos e querernos de aquí á lúa. Ademais, somos parte dunha familia mixta afrodescendente, entrando de cheo nunha realidade que nos empuxa a deconstruirnos e aprender a ver o mundo desde outro prisma ao que non estabamos afeitas, iniciando unha viaxe de luces e sombras constantes.

Fillas de mestra, o amor pola educación e a dignidade da profesión están no noso ADN desde o berce. Cremos firmemente que podemos achegar unha visión importante á comunidade educativa. O tándem Ciencias Sociais-Educación é un marco que ofrece múltiples posibilidades para nutrirse de recursos e ferramentas ante o desafío que supón a convivencia e a diversidade étnico-racial nos barrios e as cidades que habitamos.